Dita e garës në Çmimin e Madh të Katarit pritet të sjellë emocione të forta, pasi Lando Norris ka mundësinë të bëhet kampion bote në Formula 1 për herë të parë.
Megjithatë, britaniku e ka punën të vështirë, ai nis vetëm nga vendi i dytë, menjëherë pas shokut të skuadrës dhe rivalit të tij për titull, Oscar Piastri.
Në lojë mbetet edhe Max Verstappen, që niset i treti si në garë ashtu edhe në renditjen e kampionatit.
Holandezi nuk pritet të dorëzohet lehtë dhe do të kërkojë me çdo kusht të futet në garën për titull.
Gara starton në orën 16:00, me parapërgatitjet që nisin nga ora 14:30. Për ata që nuk kanë mundësi ta ndjekin live, ne do t’ju informojmë në kohë reale për çdo zhvillim.
Nëse gara mbyllet me renditjen aktuale të nisjes – Piastri, Norris, Verstappen – atëherë kampioni i botës do të vendoset në garën finale në Abu Dhabi mes dy pilotëve të McLarenit, ndërsa Verstappen do të mbetej jashtë luftës për titull. Për të mbajtur gjallë shpresat, ai duhet ta mposhtë Norrisin sot.