Presidentja e Kosovës, Vjosa Osmani, ka përkujtuar ish-Presidentin Ibrahim Rugova në 81-vjetorin e lindjes së tij, duke e cilësuar atë si arkitekt të pavarësisë dhe simbol të qëndresës së Kosovës.
Në një postim, Osmani theksoi se Rugova mbetet frymëzim i përhershëm dhe udhërrëfyes drejt lirisë dhe pavarësisë.
Ajo ka theksuar urtësinë, kulturën politike dhe vizionin largpamës të presidentit historik, i cili ngriti çështjen e Kosovës në majat e diplomacisë botërore.
“I lindur 81 vjet më parë, arkitekti i pavarësisë, Presidenti historik dr. Ibrahim Rugova ishte zëri i arsyes dhe vendosmërisë në kohë të errëta, si dhe udhërrëfyes drejt lirisë dhe pavarësisë. Me urtësinë, kulturën politike dhe vizionin largpamës, Presidenti Rugova e ngriti çështjen e Kosovës në majat e diplomacisë botërore.
Ai mbetet frymëzim i përhershëm, simbol i qëndresës dhe i ëndrrës së madhe për një Kosovë të lirë, të pavarur dhe demokratike. Trashëgimia e Presidentit është testament për paqen, për shtetin sovran dhe të integruar në familjen euro-atlantike. Lavdi jetës, veprës dhe idealit të Presidentit historik”, ka shkruar Osmani.