Në Gjykatën Themelore në Prishtinë, ka nisur procesi gjyqësor ndaj ministres në detyrë të MINT-it, Rozeta Hajdari për rezervat shtetërore.
Po ashtu procesi ka nisur edhe për tre zyrtarët tjerë Irfan Lipovica, Hafiz Gara e Ridvan Muharremi, njofton Dukagjini.
Në seancë nuk është e pranishme ministrja në detyrë e MINT, Rozeta Hajdari, por vetëm Ifran Lipovica dhe Hafiz Gara.
Prokuroria Speciale e Republikës së Kosovës (PSRK) në aktakuzën e ngritur ndaj ministres në detyrë Rozeta Hajdari, ish-zëvendëssekretarit Irfan Lipovica, drejtorit të Departamentit të Rezervave Shtetërore në këtë Ministri, Hafiz Gara dhe afaristit Ridvan Muharremi, ka vlerësuar se dëmi që iu shkaktua buxhetit të Kosovës në rastin e “Rezervave shtetërore” është afër 3 milionë euro.
“Gjykata i ka dërguar ftesën përmes postës, mirëpo deri më sot nuk kemi marrë ndonjë përgjigje se e njëjta është pranuar në mënyrë të rregullt ose jo” ka thënë gjyqtari për Rozeta Hajdarin.
Në mungesë të te akuzuarës Rozeta Hajdari dhe mbrojtësit të Irfan Lipovica, seanca e sotme nuk ka kushte të mbahet.