Kryetari i Lidhjes Demokratike të Kosovës dhe kandidati për kryeministër të ardhshëm, Lumir Abdixhiku, vlerëson se shteti i detyrohet qytetarit jo vetëm në krizër, por që nga dita e parë.
Kësisoj, Abdixhiku bën të ditur se LDK-ja ka vizion “Kontratën e jetës me shtetin” teksa zotohet se do të jetë me qytetarët në çdo hap e sferë, njofton Dukagjini.
“Ne besojmë se shteti duhet të jetë i pranishëm në çdo hap të jetës së qytetarit; jo si bamirës, por si partner. Prandaj ky është vizioni ynë! Kontrata e Jetës me Shtetin. Ne besojmë në një shtet që nuk shfaqet vetëm në zgjedhje, por ecën me qytetarin në çdo hap të jetës. Që nga lindja, me 200 euro në muaj për çdo të porsalindur për një vit. Me çerdhe publike dhe edukim të hershëm cilësor. Me mësim tërëditor, shujta të ngrohta dhe kushte të barabarta në shkolla. Me teknologji, kodim dhe përgatitje reale për të ardhmen. Me trajnim për 40 mijë të rinj dhe punësim të garantuar pas diplomimit. LDK ka plan. Ka ekip. Ka vullnet. 123 është zgjedhja”, ka shkruar Abdixhiku.