Këshilli Prokurorial i Kosovës (KPK) do të mbajë më 29 dhjetor 2025 takimin e radhës, ku një nga pikat kryesore të rendit të ditës do të jetë përzgjedhja e Zëvendës-Kryeprokurorit të Shtetit.
Sipas dokumenteve të siguruara nga “Betimi për Drejtësi”, ushtruesi i detyrës së Kryeprokurorit të Shtetit, Agron Qalaj, i ka propozuar KPK-së emrin e Aleksandër Lumezit për këtë pozitë.
Kjo çështje është e paraparë në pikën e shtatë të rendit të ditës së mbledhjes, e cila titullohet “Propozimi i u.d. Kryeprokurorit të Shtetit për zgjedhjen e Zëvendës Kryeprokurorit të kësaj zyre”.
Në një shkresë zyrtare të datës 24 dhjetor, të drejtuar KPK-së, Qalaj ka arsyetuar propozimin e tij duke theksuar nevojën për garantimin e vazhdimësisë institucionale dhe ushtrimin e plotë të kompetencave të Zyrës së Kryeprokurorit të Shtetit.
“… me qëllim që të garantohet vazhdimësia institucionale, ushtrimi i plotë i kompetencave dhe përmbushja e të gjitha detyrave dhe përgjegjësive në përputhje me legjislacionin në fuqi, propozoj caktimin e prokurorit të Zyrës së Kryeprokurorit të Shtetit, z.Aleksandër Lumezi, në pozitën e Zëvendës Kyreprokurorit të Shtetit”, thuhet në këtë shkresë.
Ky zhvillim vjen pak ditë pasi Agron Qalaj është caktuar në pozitën e ushtruesit të detyrës së Kryeprokurorit të Shtetit. Vendimi u mor në mbledhjen e KPK-së më 22 dhjetor 2025, pas miratimit të kërkesës për dorëheqje të Besim Kelmendit nga kjo pozitë.
Vendimi përfundimtar për emërimin e Zëvendës-Kryeprokurorit të Shtetit pritet të merret në mbledhjen e 29 dhjetorit.