Miliona qytetarë evropianë tashmë përdorin mjete të inteligjencës artificiale si ChatGPT, Gemini dhe Grok, ndërsa trendi është në rritje të vazhdueshme në mbarë kontinentin.
Sipas të dhënave të Eurostat për vitin 2025, rreth një në tre persona të moshës 16–74 vjeç në Bashkimin Evropian ka përdorur të paktën një herë gjatë vitit ndonjë mjet të inteligjencës artificiale gjeneruese (Gen AI).
Megjithatë, përdorimi i këtyre teknologjive ndryshon ndjeshëm nga një vend në tjetrin. Në 33 shtete evropiane, përqindja e përdoruesve varion nga 18% në Rumani deri në 48% në Danimarkë, ndërsa në Turqi përdorimi ka arritur në një nivel të jashtëzakonshëm prej 170%, krahasuar me bazën e të dhënave të mëparshme. Në anën tjetër, Norvegjia shënon një normë prej 56%.
Sipas Eurostat, në 13 vende evropiane, të paktën dy në pesë qytetarë kanë përdorur mjete të inteligjencës artificiale gjatë tre muajve të fundit para zhvillimit të anketës. Ndër këto vende janë: Zvicra (47%), Estonia (47%), Malta (46%), Finlanda (46%), Irlanda (45%), Holanda (45%), Qipro (44%), Greqia (44%), Luksemburgu (43%), Belgjika (42%) dhe Suedia (42%).
Të dhënat zbulojnë një ndarje të qartë gjeografike, ku vendet nordike dhe ato me zhvillim të avancuar dixhital udhëheqin përdorimin e Gen AI, ndërsa vendet e Evropës Jugore, Qendrore dhe Ballkanike mbeten pas. Në këto të fundit, mungesa e njohurive për ekzistencën dhe përdorimin e teknologjisë është një ndër arsyet kryesore të përhapjes së ulët.
Në nivel mesatar, 25% e qytetarëve në BE kanë përdorur inteligjencën artificiale për qëllime personale, ndërsa 15% për arsye profesionale. Në çdo vend, përdorimi personal është më i lartë se ai për punë, edhe pse diferenca në mes të dyve ndryshon ndjeshëm sipas vendit.