Kryeministri i Mbretërisë së Bashkuar, Boris Johnson, ka njoftuar për dorëheqjen e tij si lider i Partisë Konservatore pas një vale dorëheqjesh të anëtarëve të qeverisë. Por, ai mbetet ende kryeministër deri në zgjedhjen e një kryeministri të ri.
Këtë ngjarje e ka komentuar, presidenti i Ukrainës, Volodymyr Zelenskyy, nëpërmjet një postimi në faqen e tij në Facebook, ku ka shprehur pikëllimin e tij dhe të gjithë popullit ukrainas, për lajmin e dorëheqjes së kreut të Partisë Konservatore.
“Miku Boris Johnson, të gjithë ukrainasit u pikëlluan nga lajmi i dorëheqjes së kreut të Partisë Konservatore”, ka shkruar Zelenskyy.
Gjithashtu, ai u shpreh mirënjohës për ndihmën që i ka ofruar Johnson si kryeministër i Britanisë, që në ditët e para të luftës.
“ I jemi sinqerisht mirënjohës për ndihmën vendimtare dhe të pakompromis që në ditët e para të luftës. Faleminderit të veçantë për udhëheqjen tuaj në mbrojtjen e interesave të Ukrainës në arenën ndërkombëtare”, ka vazhduar Zelenskyy.
Për fund, Zelenskyy tha se nuk ka asnjë dyshim që mbështetja e Mbrëtërisë së Bashkuar do të ruhet, dhe do të mbeten miq dhe aleatë të fortë.