Parlamenti finlandez ka ndryshuar ligjet e tij të martën e 5 korrikut, për të forcuar gardhet përgjatë kufirit të vendit me Rusinë, ndërsa kombi nordik vazhdon procesin e anëtarësimit në NATO.
Pasi Rusia ka nisur pushtimin e saj në Ukrainë më 24 shkurt, Finlanda ka vendosur të zyrtarizojë partneritetin e ngushtë prej dekadash me NATO-n dhe të aplikojë për t’u bashkuar me aleancën ushtarake.
Të motivuar nga shqetësimet se Moska do të përdorë emigrantët për të ushtruar presion ndaj Helsinkit, amendamentet e reja në ligjin e Finlandës për rojet kufitare e kanë bërë më të lehtë ndërtimin e barrierave më të forta përgjatë kufirit prej 1300 kilometrash që Finlanda ndan me Rusinë.
Qëllimi i ligjit të ri është të “përmirësojë kapacitetin operacional të rojes kufitare për t’iu përgjigjur kërcënimeve hibride”, ka thënë Anne Ihanus, një këshilltare në ministrinë e brendshme të Finlandës.
“Lufta në Ukrainë ka kontribuar në urgjencën e çështjes,” ka shtuar ajo.
Aktualisht, kufiri i Finlandës me Rusinë është i siguruar vetëm me gardhe të lehta prej druri, të instaluara kryesisht për të parandaluar kullotjen e bagëtive në anën e gabuar.
“Ajo që ne duam të ndërtojmë tani është një gardh i fortë me një efekt të vërtetë pengues,” ka theksuar kreu i divizionit ligjor të Rojës Kufitare Finlandeze, Sanna Palo.
Ligji i ri do të lejojë gjithashtu mbylljen e pikave kufitare dhe përqendrimin e azilkërkuesve në vende të veçanta, transmeton euronews.
Finlanda ka miratuar gjithashtu ndryshime në Aktin e saj të Kompetencave Emergjente për të siguruar që përkufizimi i “emergjencës” të marrë parasysh më mirë llojet e ndryshme të të ashtuquajturave kërcënime hibride.