Hykmete Bajrami ka dhënë dorëheqje të parevokueshme nga pozita e nënkryetares së Lidhjes Demokratike të Kosovës (LDK).
Ajo po ashtu, ka kërkuar dorëheqjen e kryetarit të partisë, Lumir Abdixhiku.
Në një postim në Facebook, Bajrami ka bërë të ditur se vendimi i saj është nxitur nga rezultatet e dobëta të zgjedhjeve të 28 dhjetorit dhe nga respektimi i standardeve që LDK-ja vetë ka ndërtuar gjatë viteve.
Ajo ka theksuar se dorëheqja nuk është personale as emocionale, por një veprim për të mbajtur përgjegjësi politike dhe për të hapur rrugë për zgjedhje të brendshme në parti.
Bajrami ka shtuar se sfida kryesore për Kosovën mbetet rreziku i përqendrimit të pushtetit te një parti ose individ, dhe se LDK-ja duhet të vendosë interesin e vendit përpara interesit politik partiak.
Ajo gjithashtu falënderoi qytetarët që i dhanë mbështetje gjatë angazhimit të saj politik dhe deklaroi se do të vazhdojë të punojë si deputete në Kuvendin e Kosovës.
Sipas saj, LDK-ja ka nevojë për reflektim, përgjegjësi dhe vizion për të ardhmen.