Inspektim të shpejtë dhe të detajuar në të gjitha pjesët e automjeteve.
Këtë do ta ofrojë skaneri i ri Rapid Scan që Dogana e Kosovës ka pranuar nga SHBA-të, një donacion në vlerë prej dy milionë eurosh.
“Ky është edhe një shembull tjetër i partneritetit të fortë ndërmjet Shteteve të Bashkuara dhe institucioneve të Kosovës, përfshirë Doganën dhe Policinë Kufitare. Dua t’i përgëzoj Doganën e Kosovës dhe Policinë Kufitare për profesionalizmin e tyre, dedikimin dhe bashkëpunimin me qeverinë amerikane ndër vite. Puna juaj është kritike në sigurimin e kufijve të Kosovës dhe integritetin e tregtisë”, ka thënë Anu Pratipati, e ngarkuara me punë e SHBA-së në Kosovë.
“Skaneri pritet ta lehtësojë punën e Doganës, si në rastin konkret:
Është hasur sasi e drogës 125 kg e koncentruar në pjesën e poshtme të autobusit”, ka thënë një zyrtar i Doganës.
“Për neve është mesazh i përkrahjes për punën që e bëjmë në sigurinë e kufirit. Vizioni është të përkushtohemi në kufinjët e sigurt për sundim të ligjit, zhvillim ekonomik dhe lehtësira në tregti…”, ka thënë drejtori i Doganës, Agron Llugaliu.
I njëjti, u mirëprit nga ministri në detyrë i punëve të Brendshme, Xhelal Sveçla e ai i Financave, Hekuran Murati
“Investimet në teknologji moderne, infrastrukturë dhe burime njerëzore janë elemente kyçe për një menaxhim efektiv dhe të qëndrueshëm të kufirit. Jam shumë i lumtur që në pikën kufitare në Merdare po inaugurojmë skenerin RAPI Scan, i cili vjen si donacion nga SHBA. Ky donacion përbën jo vetëm një avancim të rëndësishëm teknologjik, por edhe një dëshmi konkrete të partneritetit të fuqishëm dhe të qëndrueshëm mes Kosovës dhe SHBA-së”, ka thënë Sveçla.
“Besoj do të përshpejtojë, do të lehtësojë qarkullimin e mallrave dhe në të njëjtën kohë duke siguruar që ka integritet edhe procesi i verifikimit të mallrave dhe sigurisë së përgjithshme”, ka thënë Murati.
Në Qershor 2023, pas rrëmbimit të tre policëve kosovarë në Leposaviq nga Serbia, Kosova kishte vendosur masa të shtuara sigurie ndaj shtetit fqinj.
Me qëllim të zhbllokimit të marrëveshjes për tregti të lirë – CEFTA, Kosova në 2024 vendosi t’i lehtësojë masat e sigurisë në pikën kufitare në Merdare dhe ky veprim u ndërmorr krahas premtimit të partnerëve ndërkombëtarë se do ndihmojnë Kosovën në pajisjen me skanerë.