Dalëngadalë listës së komunave në të cilat po përmbyllet procesi i rinumrimit të votave për zgjedhjet e 28 dhjetorit po i vjen fundi.
Në qendrën e numriti e rezultateve tashmë janë rinumëruar mbi 1 mijë e 600 vendvotime nga 2 mijë e 557 sa do rinumërohen.
Procesi u përmbyll në 23 komuna të Kosovës.
“Nga 13 janari, në Qendrën e Numërimit dhe Rezultateve është duke vazhduar procesi i rinumërimit të vendvotimeve për të cilat është vendosur nga KQZ. Ky proces është duke vazhduar sipas planifikimeve dhe mund të them se KQZ është duke u përpjekur maksimalisht që gjatë javës së ardhshme të arrijë të përmbyllë rinumërimin e të gjitha vendvotimeve”, ka theksuar Valmir Elezi – Zëdhënës i KQZ-së.
Elezi thotë se ky rinumërim do zvogëlojë nevojën për ankesa nga subjektet politike dhe kandidatët.
“Ashtu siç parashihet në Ligjin për Zgjedhjet e Përgjithshme, subjektet politike dhe kandidatët do të mund të parashtrojnë ankesat e tyre në PZAP dhe, eventualisht, procesi mund të vazhdojë deri në Gjykatën Supreme. Natyrisht, procesi i rinumërimit i heq dilemat sa i përket rezultateve dhe kjo mund të zvogëlojë nevojën për ankesa, por KQZ duhet të presë afatin për paraqitjen dhe shqyrtimin e tyre para se të procedojë me certifikimin e rezultatit të zgjedhjeve dhe njëkohësisht me përmbylljen e procesit zgjedhor”, ka deklaruar Elezi.
Deri tash rinumërimi i votave për kandidatët për deputet ka vë në pah keqpërdorime të mijërave votave në disa komuna të Kosovës, por më së shumti në Prizren.
Pas devijimeve në rezultat, KQZ-ja vendosi që të rinumrojë të gjitha vendvotimet, e prokuroritë u angazhuan në hetimin e këtyre rasteve.