Instituti Hidrometeorologjik i Kosovës ka njoftuar se gjatë kësaj jave vendi do të përfshihet nga mot i ndryshueshëm, kryesisht i vranët dhe me reshje shiu.
Sipas IHK-së, reshjet më intensive priten ditën e hënë, lokalisht me intensitet mesatar deri të lartë, çka mund të shkaktojë grumbullim uji në zona urbane dhe vështirësi në komunikacion.
Për këtë arsye, qytetarëve u rekomandohet kujdes i shtuar, veçanërisht gjatë udhëtimeve.
Temperaturat minimale gjatë javës do të lëvizin nga -1 deri në 5 gradë Celsius, ndërsa ato maksimale nga 6 deri në 10 gradë Celsius.
Të mërkurën parashihen kushte për mjegull në disa zona, kryesisht në viset mesatare, lugina dhe përgjatë relievit malor, duke ulur dukshmërinë në orët e mëngjesit.
Era do të fryjë nga drejtime të ndryshme, me shpejtësi deri në 5 metra për sekondë.
IHK u bën thirrje qytetarëve që të hënën të shmangin udhëtimet e panevojshme gjatë reshjeve intensive, të përshtatin shpejtësinë me kushtet e rrugës dhe të tregojnë kujdes të shtuar në zonat ku paraqitet mjegull gjatë mesjavës.