Prokuroria Themelore në Prishtinë, ka njoftuar se, në bashkëpunim me Policinë e Kosovës dhe në koordinim të plotë me Gjykatën Themelore në Prishtinë, ka zhvilluar një aksion ndaj disa zyrtarëve të Komunës së Prishtinës, nën dyshimin për veprat penale “Keqpërdorimi i pozitës apo autoritetit zyrtar” dhe “Marrja e ryshfetit”.
Gjatë këtij aksioni, tre persona janë shoqëruar, ndër të cilët zyrtari i komunës, A.G., është arrestuar në flagrancë për marrje ryshfeti.
Sipas Prokurorisë, ai dyshohet se ka kërkuar ryshfet për të ndihmuar një të dëmtuar të kryente pagesa për punë që kishte bërë sipas kontratës me komunën.
“Gjatë zbatimit të masave të veçanta hetimore, janë shoqëruar tre persona, ndër të cilët zyrtari i komunës, A.G., është arrestuar në flagrancë për veprën penale ‘’Marrje e ryshfetit’’ sipas nenit 421 të KPRK-së, me qellim qe të ndihmojë të dëmtuarin të realizoj një pagesë për punët të cilat i kishte kryer sipas kontratës me komunën”, thuhet nga ana e Prokurorisë.
Prokuroria Themelore në Prishtinë i bën thirrje të gjithë qytetarëve që të raportojnë çdo rast të korrupsionit dhe të bashkëpunojnë me organet e drejtësisë për parandalimin e veprave penale.
Tre zyrtarë të Komunës së Prishtinës arrestohen për ryshfet, njëri u kap në flagrancë