Mijëra protestues kanë marshuar në qendër të Los Anxhelos, ku janë përplasur me agjentë federalë përpara Gjykatës Federale Edward R. Royalbal, në sfondin e incidenteve vdekjeprurëse në Minesota dhe një vale gjithnjë e më të ashpër masash kundër imigracionit në Shtetet e Bashkuara.
Sipas raportimit të CBS, protestuesit u mblodhën të premten pasdite para Bashkisë dhe më pas marshuan në mënyrë paqësore drejt lagjes Boyle Heights. Situata u përshkallëzua kur ata bllokuan hyrjen e ndërtesës federale.
Gjatë përplasjes, disa protestues hodhën sende drejt agjentëve federalë, ndërsa të tjerë tentuan të përdornin një kontejner mbeturinash ndërtimi si barrikadë.
Në përgjigje, agjentët federalë përdorën topa piperi dhe gaz lotsjellës, ndërsa policia e Los Anxhelosit lëshoi urdhra për shpërndarje dhe paralajmërime taktike për turmën.
Autoritetet policore njoftuan gjithashtu për zjarre të vogla në kontejnerët pranë ndërtesës federale, duke theksuar se zjarrfikësit u detyruan të presin sigurimin e zonës nga policia përpara se të ndërhynin.