Mësimdhënësi që u shfaq në pamje duke ushtruar dhunë fizike ndaj një nxënësi në shkollën fillore “Pavarësia” në Prishtinë është dërguar në stacion policor.
Lajmin e ka konfirmuar zëdhënësi i Policisë për rajonin e Prishtinës, Enis Pllana, i cili ka bërë të ditur se rasti është duke u hetuar në koordinim me Prokurorinë.
“Sot rreth orës 12:00 kemi pranuar informatën për një rast sulmi fizik të ndodhur në një shkollë fillore në Prishtinë. Menjëherë policia ka dalë në vendin e ngjarjes dhe ka shoqëruar në stacion policor palët e përfshira në rast. Aktualisht, policia në koordinim me prokurorinë ka nisur hetimet për zbardhjen e plotë të rastit”, ka deklaruar Pllana.
Në një video nga Kallxo, shihet një mësimdhënës i kësaj shkolle duke ushtruar dhunë fizike ndaj një nxënësi.
Drejtori i shkollës “Pavarësia”, Halil Brahaj, e ka konfirmuar rastin.
Ai ka bërë të ditur se në momentin e incidentit nuk ndodhej në shkollë, por se është informuar për ngjarjen, të cilën e ka konfirmuar përmes telefonit.