Ministri i Administrimit të Pushtetit Lokal në Qeverinë e Kosovës, Elbert Krasniqi, ka pritur të premten kryetarët e dhjetë komunave me shumicë serbe për të diskutuar koordinimin e përgjegjësive institucionale mes nivelit qendror dhe atij lokal.
Në këtë takim, Krasniqi ka thënë se Qeveria dhe MAPL janë të gatshme të ofrojnë ndihmë dhe mbështetje për zgjidhjen e problemeve që ndikojnë direkt në qytetarë.
“Për të koordinuar përgjegjësitë institucionale në mes të dy niveleve kam pritur në takim kryetarët e dhjetë komunave me shumicë serbe.
Gjatë këtij takimi kam dëgjuar me kujdes secilin Kryetarë të Komunës, për çdo sfidë te tyre. Qeveria në përgjithësi dhe MAPL në veçanti është e gatshme të ofroj ndihmen dhe mbështetjen e nevojshme për zgjedhjen e problemeve të cilat janë me interes për qytetarët.
Ky takim i sotëm është një nga forumet për komunikim e koordinim me komunat, përfshirë atë ku bëjnë pjesë 38 komuna, si platformë më e mirë për komunikim e koordinim ndërmjet nivelit qëndror dhe atij lokal.
Takimet e radhës me agjenda konkrete e të detajuara do të vazhdojnë, në interesin më të mirë të qytetarëve të Republikës, përmes bashkëpunimit të nivelit qendror dhe atij lokal, ka shkruar Krasniqi.