Me 10 vota për, asnjë kundër dhe asnjë abstenim, ka kaluar propozimi për përfshirjen e buxhetit të Komunës së Prishtinës, në projekt-buxhetin e këtij viti.
Çështja e buxhetit riktheu kritikat e Komunës në drejtim të Qeverisë, dhe për këtë çështje, sot në Komisionin për Buxhet, u paralajmërua një amandament nga LDK, përmes deputetit Besian Mustafa.
Megjithatë, propozimit të tij ia parapriu ai i Ministrit të Financave, Hekuran Murati.
“Duke marrë parasysh që ditën e sotme ne duhet t’i përmbyllim çështjet e amandamenteve, komuna e Zubin Potokut mbetet që të trajtohet sapo ta kompletojnë procedurën, e dorëzojnë njoftimin dhe buxhetin tek Ministria e Financave, me ç’rast pastaj ne si ministri e procedojmë në qeveri, mbledhje të qeverisë dhe nga qeveria vjen në kuvend dhe trajtohet si ndryshim-plotësim pra i shtohet ligjit të buxhetit tabela e Zubin Potokut. Por sa i përket Prishtinës, komunës së Prishtinës dhe komunës së Shtimes, këto komuna tashmë kanë përmbushur të gjitha detyrimet dhe janë të gatshme që të përfshihen. Prandaj rekomandimi i Ministrisë së Financave do të ishte që komisioni pra të propozojë si amandament tek pjesa tabelare pra përditësimin e tabelave të këtyre dy komunave ashtu siç janë miratuar në kuvendet komunale dhe janë dorëzuar tek Ministria e Financave”, ka thënë Murati.
Pas kalimit të këtij propozimi, Mustafa hoqi dorë nga iniciativa e tij por, jo pa një arsyetim.
“Kërkesa ime ka qenë të shtojmë një nen ku aplikohet ministri që të bëjë përshtatjen e tabelave të nevojshme buxhetore…për të përfshirë buxhetin e Prishtinës në buxhetin për vitin 2026 të miratuar në Kuvendin Komunal. Pasi që patëm pajtushmëri të gjerë…po e tërheq këtë amandament”, ka thënë Mustafa.
Përveç për Prishtinën, Komisioni për Buxhet ka miratuar edhe propozimin e Ministrisë së Financave për përfshirjen e buxhetrit për Shtimes, derisa ajo e Zubin Potokut mbetet në pritje të përmbushjes së procedurave të parapara ligjore.