Presidenti i Shteteve të Bashkuara, Donald Trump, ka kritikuar kryeministrin britanik, Keir Starmer, për rolin e tij gjatë sulmeve të SHBA-së ndaj Iranit.
Në një intervistë për gazetën The Sun, Trump tha se Starmer “nuk ka qenë ndihmues. Nuk mendoja se do ta shihja këtë nga Mbretëria e Bashkuar”.
Në një bisedë telefonike, ai shtoi se “është shumë e trishtueshme të shohësh se marrëdhënia dukshëm nuk është si më parë”.
Kryeministri Starmer kishte deklaruar të hënën para Dhomës së Komunëve se qeveria britanike “nuk beson në ndryshimin e regjimit nga qielli”.
Britania fillimisht nuk lejoi SHBA-në të përdorte bazat e saj për sulme ndaj Iranit, por më pas i hapi ato për goditje “mbrojtëse” ndaj objektivave iraniane.
Trump gjithashtu tha se Franca dhe disa vende të tjera ishin “shumë mbështetëse”, ndërsa shtoi se “Britania ka qenë shumë më ndryshe nga të tjerët”.