Presidenti i Turqisë, Recep Tayyip Erdogan, ka reaguar ndaj përshkallëzimit të tensioneve në Lindjen e Mesme, duke theksuar se, pavarësisht paralajmërimeve të vazhdueshme nga Ankaraja, Irani po vazhdon të ndërmarrë veprime që rrisin tensionet në rajon.
Duke folur pas mbledhjes së kabinetit qeveritar, Erdogan nënvizoi se prioriteti kryesor i Turqisë mbetet mbrojtja e sigurisë kombëtare dhe ruajtja e stabilitetit për qytetarët e saj.
“Qëllimi ynë kryesor është ta mbajmë vendin tonë larg këtij zjarri. Garantimi i sigurisë së Turqisë dhe paqes së 86 milionë qytetarëve tanë është prioriteti ynë më i madh në këtë proces. Nuk duam që as edhe një fije floku e qytetarëve tanë të dëmtohet”, deklaroi presidenti turk.
Ai shtoi se, ndërkohë që disa aktorë në rajon po kontribuojnë në përshkallëzimin e situatës duke “hedhur benzinë mbi zjarr”, Turqia synon të luajë një rol stabilizues për të frenuar përhapjen e konfliktit dhe për të kontribuar në uljen e tensioneve.
Sipas Erdoganit, edhe pse Ankaraja ka dhënë paralajmërime të sinqerta, Irani po vazhdon të ndërmarrë hapa që mund të çojnë drejt një përshkallëzimi të mëtejshëm të situatës.
“Ne nuk duhet të lejojmë që marrëdhëniet tona vëllazërore të dëmtohen. Përpjekjet tona për të parandaluar përshkallëzimin e mëtejshëm të konfliktit janë të qarta”, theksoi ai.
Në fund, presidenti turk bëri të ditur se Turqia do të vazhdojë të monitorojë nga afër zhvillimet në rajon, në koordinim me NATO-n dhe partnerët e saj ndërkombëtarë, duke ndërmarrë çdo hap të nevojshëm për mbrojtjen e interesave dhe sigurisë së vendit.