Një grup kongresmenësh dhe senatorësh amerikanë i kanë dërguar një letër Sekretarit amerikan të Shtetit, Marco Rubio, duke shprehur shqetësim për raportimet se administrata e presidentit Donald Trump mund të reduktojë praninë e trupave amerikane në misionin paqeruajtës të NATO-s në Kosovë, KFOR.
Ligjvënësit paralajmërojnë se një tërheqje e parakohshme mund të destabilizojë jo vetëm Kosovën, por edhe rajonin e gjerë të Ballkanit Perëndimor, duke përfshirë veçanërisht Bosnje dhe Hercegovinën.
“Çdo reduktim i personelit ushtarak amerikan mund të ketë implikime të konsiderueshme jo vetëm për aftësitë operacionale të forcës paqeruajtëse, por edhe të dobësojë rolin e KFOR-it si një pengesë politike në ruajtjen e paqes dhe stabilitetit në Kosovë… Për më tepër, një prani e reduktuar e SHBA-së mund të inkurajojë aktorët që e shohin mosangazhimin perëndimor si një mundësi për të mbjellë trazira”, thuhet në letër.
Ata theksojnë se ruajtja e niveleve aktuale të trupave amerikane është thelbësore për mbrojtjen e interesave strategjike të Shteteve të Bashkuara dhe për parandalimin e përshkallëzimit të tensioneve në rajon.
Letra gjithashtu paralajmëron për rrezikun që mund të krijojë një tërheqje amerikane ndaj forcave nacionaliste dhe separatiste në rajon, përfshirë liderin e entitetit Republika Srpska, Milorad Dodik, si dhe ndikimin destabilizues të Rusisë në Ballkanin Perëndimor.
Ligjvënësit i kanë bërë thirrje Departamentit të Shtetit që çdo vendim për ndryshimin e pranisë ushtarake amerikane në Kosovë të koordinohet ngushtë me Kongresin dhe të merren parasysh implikimet për stabilitetin rajonal.
Në letër janë nënshkruar kongresistët dhe senatorët: Michael R. Turner, Brendan F. Boyle, Gregory W. Meeks, Rick Larsen, Jeanne Shaheen, Charles Grassley, Thom Tillis, Roger Wicker, Ann Wagner, Chris Van Hollen, Joni Ernst dhe Peter Welch.
