Sekretarja e Jashtme e Mbretërisë së Bashkuar, Yvette Cooper, ka deklaruar në Dhomën e Komunave të Parlamentit britanik se numri i shtetasve britanikë që janë kthyer nga Lindja e Mesme pritet të arrijë në rreth 100 mijë gjatë ditës së sotme, ndërsa kriza në rajon vazhdon të përshkallëzohet.
Ajo bëri të ditur se mbi 300 mijë qytetarë britanikë ndodheshin në rajon në fillim të krizës dhe se përpjekjet për kthimin e tyre kanë qenë intensive, shkruan BBC, transmeton Dukagjini.
Cooper theksoi gjithashtu se Mbretëria e Bashkuar “nuk do të përfshihet në një luftë më të gjerë dhe nuk do të delegojë politikën e saj të jashtme tek të tjerët”.
Në të njëjtën deklaratë, ajo njoftoi se Iran ka ndërmarrë sulme të gjera në rajon, duke lëshuar mbi 900 raketa dhe rreth 3,000 dronë në 13 vende të Lindjes së Mesme.
Si pjesë e përgjigjes mbrojtëse, Mbretëria e Bashkuar ka dislokuar katër avionë luftarakë Typhoon, tre helikopterë Wildcat dhe një helikopter Merlin për të forcuar praninë dhe sigurinë në zonë.
Duke folur për situatën në Lebanon, Cooper u shpreh se është “jashtëzakonisht e shqetësuar” dhe paralajmëroi se vendi ndodhet në prag të një përshkallëzimi të rrezikshëm që mund të sjellë pasoja të rënda humanitare.
Ajo njoftoi gjithashtu një fond prej 10 milionë paundësh për ndihmë humanitare, i cili do të përdoret për kujdes mjekësor emergjent, strehim dhe mbështetje të tjera jetike për popullsinë e prekur.
Deklaratat vijnë në një moment tensioni të lartë në Lindjen e Mesme, ndërsa komuniteti ndërkombëtar po përpiqet të shmangë një konflikt më të gjerë në rajon.