Gjykata Themelore në Gjakovë ka aprovuar kërkesën e Prokuroria Themelore e Gjakovës, duke i caktuar masën e paraburgimit prej një muaji të pandehurit me inicialet N. Z., i dyshuar për veprat penale “vrasje e rëndë” dhe “mbajtje në pronësi, kontroll ose posedim të paautorizuar të armëve”.
Sipas Prokurorisë të hënën në rrugën “Vëllezërit Frashëri” në Gjakovë, në një lokal, i pandehuri me dashje ka privuar nga jeta tani të ndjerin R. B., duke vënë në rrezik edhe jetën e të dëmtuarit E. M., dhe personave të tjerë që kanë qenë prezent në vendin e ngjarjes, njofton Dukagjini.
“Në atë mënyrë që ditën kritike derisa i pandehuri ka qenë me të dëmtuarin E. M., dhe persona të tjerë, në vendin e ngjarjes respektivisht në lokalin e lartcekur shkon tani i ndjeri dhe pas një mosmarrëveshje i pandehuri me armën e tij pistoletë e llojit TT, ka shtënë disa herë në drejtim tani të ndjerit R. B., e që si pasojë e të shtënave në pjesë të ndryshme të trupit të tij, i njëjti ndërron jetë në afërsi të vendit të ngjarjes. Gjithashtu si pasojë e të shtënave me armë i pandehuri rrezikon jetën e personave të tjerë, ku i dëmtuari E. M., pëson lëndime trupore dhe dërgohet në emergjencën e Spitalit Rajonal ‘Isa Grezda’ në Gjakovë për trajtim mjekësor, ndërsa i pandehuri largohet nga vendi i ngjarjes”, thuhet në njoftimin e Prokurorisë.
Pas incidentit, i dyshuari është larguar nga vendi i ngjarjes.
Gjyqtari i procedurës paraprake, Samedin Cena, ka vlerësuar se janë përmbushur kushtet ligjore për caktimin e paraburgimit, duke vendosur që i pandehuri të qëndrojë në paraburgim për një muaj, nga 16 marsi deri më 16 prill 2026.
Kujtojmë se Rasim Binakaj, i cili u vra të hënën në Gjakovë, do të varroset këtë të mërkurë.
Sipas njoftimit të familjes, ceremonia e varrimit do të mbahet nga ora 14:00, në lagjen Binakaj të fshatit Devë, njofton Dukagjini.