Mbrëmjen e së dielës, një person ka mbetur i vrarë dhe dy gra janë plagosur me armë zjarri në fshatin Majac të Podujevës.
Rrethanat dhe motivet e ngjarjes ende nuk janë të qarta, ndërsa Prokuroria Themelore në Prishtinë e ka konfirmuar rastin.
Siç raportohet i vrari është një burrë, ndërsa të plagosurat janë një 31-vjeçare dhe një rreth 73-vjeçare.
Ngjarjen e ka konfirmuar kryeprokurori i Prokurorisë Themelore në Prishtinë, Zejnullah Gashi, duke bërë të ditur se prokurorja kujdestare ka dalë në vendin e ngjarjes për veprimet hetimore.
Sipas Qendrës Klinike Universitare të Kosovës, pacientet janë në gjendje shumë të rëndë dhe janë intubuar, duke u mbajtur me frymëmarrje të asistuar.
Njëra nga to është dërguar në sallën operative ku po trajtohet nga ekipet e Neurokirurgjisë dhe Anestezionit.
“Dy paciente gjinisë femrore, njëra e lindur më 1953 tjetëra 31-vjeçare, jonë sjellë nga autoambulanca e Podujevës, arsyeja lëndim me armë zjarri, gjendje shumë e rëndë dhe jostabile, jonë kryer ekzaminimet e nevojshme në QE, të dy pacientet jonë të intubuara me frymëmarrje të asistuar, njëra është dërguar në sallë operative ku janë duke punuar ekipet e Neurokorurgjisë dhe Anestezionit, gjendja e pacinteve shumë e rëndë”, ka thënë Drejtori i Emergjencës në QKUK, Naser Syla.
E dyshuara, sipas informacioneve jozyrtare që raporton “Betimi për Drejtësi“, dyshohet se tentoi të kryente vetëvrasje pas kryerjes së vrasjes.
E gjithë ngjarja, gjithnjë sipas informacioneve jozyrtare, dyshohet se ndodhi pas një mosmarrëveshje në oborr, ku ka ndërhyrë e moshuara e cila mbeti e plagosur.
Portali Dukagjini ka kontaktuar Prokurorinë dhe Policinë për detaje shtesë, por ende nuk ka marrë ndonjë përgjigje lidhur me rastin.
Dy të plagosurat në Majac të Podujevës në gjendje të rëndë shëndetësore