Sllovenia është bërë vendi i parë i Bashkimit Evropian që vendos kufizime për furnizimin me karburant, si pasojë e ndërprerjeve në tregjet energjetike të shkaktuara nga lufta mes SHBA-Izrael dhe Iranit.
Rritja e fortë e çmimeve të karburanteve ka prekur shumë vende, ndërsa në Slloveni ka nxitur fenomenin e ashtuquajtur “turizëm i karburantit”, ku drejtues mjetesh nga vendet fqinje, sidomos nga Austria, shkojnë për t’u furnizuar për shkak të çmimeve më të ulëta dhe të rregulluara.
Sipas masave të reja, qytetarët privatë do të mund të blejnë maksimumi 50 litra karburant në ditë, ndërsa bizneset dhe fermerët deri në 200 litra.
Kryeministri Robert Golob ka siguruar se nuk ka mungesë karburanti në vend.
“Depot janë të mbushura dhe nuk do të ketë mungesa,” deklaroi ai, raporton BBC.
Zbatimi i këtyre kufizimeve do të bëhet nga vetë pikat e karburantit, ku punonjësit do të kujdesen që klientët të mos furnizohen mbi limitin e lejuar.