Presidentja e Kosovës, Vjosa Osmani, ka deklaruar sot se ka kërkuar sqarim nga Gjykata Kushtetuese lidhur me emërimet e anëtarëve nga partitë politike në Komisionin Qendror të Zgjedhjeve (KQZ).
Arsyeja, sipas saj, lidhet me faktin se partitë kanë kërkuar më shumë emërime sesa lejon Kushtetuta.
Osmani sqaroi se Vetëvendosja ka kërkuar tre anëtarë dhe janë emëruar vetëm dy, ndërsa PDK-ja ka kërkuar dy dhe është emëruar vetëm një. Ajo theksoi se çështja nuk është sqaruar më parë nga Gjykata Kushtetuese dhe se ka ngritur rastin mbi një bazë tjetër ligjore, duke shpresuar se Kushtetuesja do të japë një vendim që të mund të vazhdohet me emërimet e mbetura.
“Për shkak se janë kërku tre nga Vetëvendosja, janë emëru vetëm dy. Janë kërku dy nga PDK-ja, është emëruar një, për shkak se ka më shumë propozime sesa që i lejon kushtetuta. Dhe meqenëse kjo çështje deri tani nuk është sqaruar nga Gjykata Kushtetuese, kam kërkuar që ta sqarojë atë. Mirëpo ky rast është mbi një është ngritur mbi një bazë tjetër ligjore, jo mbi të njëjtën që është ngritur në rastet e mëparshme, qoftë nga ish-presidenti Thaçi, qoftë nga ana ime. Se kjo çështje ka qenë e paqartë përgjatë viteve për secilin president në fakt. Dhe shpresoj që më në fund gjykatat ta sqarojnë. Momentin që sqarohet, vijohet me emërimet…
Jo, nuk e ka sqaruar fare. Pra, nuk ka marrë vendim. Në fakt, atëherë gjykata, meqenëse ne e kemi ngritur lëndën mbi bazën e nenit 84 pika 9, pra kemi dërguar kërkesë për sqarim, ka thënë që nuk mund të bëjë sqarime shkaku i një standardi të ri që e ka ndërtuar gjykata. Ndërkaq, tani e kemi ngritur rastin mbi një bazë tjetër kushtetuese, pra nenin 113 të Kushtetutës, dhe shpresoj shumë që gjykata do ta japë përgjigjen. Pra, nuk është që vetëm një anëtar i PDK-së nuk është emëruar; edhe një i VV-së nuk është emëruar, në qoftë se i shohim propozimet e tyre. Dhe meqenëse aty është veç një vend, nuk i zë dy, duhet me pyet gjykatën se si të veprohet”, ka thënë Osmani.