Presidenti i Ukrainës, Volodymyr Zelensky, ka bërë të ditur se disa partnerë ndërkombëtarë i kanë kërkuar Kievit të reduktojë sulmet ndaj objekteve energjetike të Rusisë, në një moment kur tregjet globale të naftës po përballen me rritje të çmimeve.
Në një deklarim për media, Zelensky theksoi se këto sinjale kanë ardhur si pasojë e tensioneve në sektorin energjetik global, megjithatë ai nuk zbuloi se cilat shtete qëndrojnë pas kësaj kërkese.
“Ne kemi marrë sinjale nga disa partnerë për të reduktuar përgjigjet tona që synojnë sektorin e naftës dhe energjisë të Federatës Ruse,” u shpreh ai.
Megjithatë, presidenti ukrainas la të kuptohet se politika e Kievit nuk do të ndryshojë lehtë, duke e kushtëzuar çdo vendim me veprimet e Rusisë.
“Nëse Rusia ndalon sulmet ndaj sektorit tonë energjetik, ne nuk do të hakmerremi ndaj sektorit të saj,” deklaroi Zelensky, duke nënvizuar se Ukraina mbetet e hapur për një armëpushim.
Prej muajsh, infrastruktura energjetike e Ukrainës është shënjestër e sulmeve të vazhdueshme ruse, duke shkaktuar ndërprerje të gjera të energjisë dhe vështirësi të mëdha për popullsinë, veçanërisht gjatë dimrit.
Si kundërpërgjigje, Ukraina ka intensifikuar goditjet ndaj objektivave energjetike në Rusi, përfshirë rafineritë dhe nyjet e eksportit, me synimin për të dobësuar të ardhurat energjetike të Moskës në një kohë të çmimeve të larta globale.