Policia e Rajonit të Prishtinës, përmes hetuesve të Njësisë së Hetimeve të Përgjithshme (NjHP), ka arrestuar një person të dyshuar për vjedhje të rëndë në kryeqytet.
Sipas njoftimit, rasti ka ndodhur më 19 janar 2026, në rrugën “Agim Ramadani” në Prishtinë, ku nga një dyqan janë vjedhur stoli ari në vlerë të konsiderueshme.
Në koordinim me prokurorin e shtetit, hetuesit policorë kanë realizuar edhe bastisje në dy lokacione të ndryshme. Gjatë këtyre veprimeve janë sekuestruar një automjet që dyshohet se është përfituar nga vepra penale, një armë zjarri dhe sende të tjera të dyshuara.
I dyshuari, me vendim të prokurorit të shtetit, është ndaluar në mbajtje, ndërsa hetimet për zbardhjen e plotë të rastit po vazhdojnë.