Prokuroria Themelore në Prizren ka ngritur aktakuzë ndaj tre personave të dyshuar për përfshirje në trafikim të narkotikëve, ku dy prej tyre ndodhen në paraburgim, ndërsa një është në arrati.
Sipas njoftimit zyrtar, Departamenti i Krimeve të Rënda ka akuzuar E.R. dhe H.K., të cilët gjenden nën masën e paraburgimit, si dhe F.H., i cili është në arrati, për veprën penale “Blerja, posedimi, shpërndarja dhe shitja e paautorizuar e narkotikëve”, njofton Dukagjini.
“Sipas aktakuzës, më datë 11.08.2025, rreth orës 21:21min, Prizren, në një objekt prapa një qendre tregtare, të pandehurit F.H., dhe E.R., duke vepruar në bashkëkryerje dhe pa autorizim, kanë transportuar dhe shpërndarë substancë narkotike të llojit kokainë në sasi prej 3.3 kilogramësh. Të njëjtit, pas komunikimit paraprak me të pandehurin H.K., lidhur me vendin e takimit, kanë arritur në lokacion me automjet dhe kanë realizuar dorëzimin e narkotikëve, duke pranuar në këmbim një automjet të tipit “VW Golf VIII”. Pas dorëzimit të narkotikëve, i pandehuri F.H., largohet me automjetin e tij “VW Arteon” me targa belge, ndërsa e pandehura E.R., e drejton automjetin e marrë në këmbim, duke e parkuar atë para banesës së saj në Prishtinë, ku i njëjti është sekuestruar nga policia. Ndërsa, automjeti i F.H., u ndalua me datë 16.08.2025 nga Policia në pikën kufitare “Hani i Elezit”, ku brenda tij u gjet edhe e pandehura E.R., si pasagjere”, thuhet në njoftim.
Sa i përket të pandehurit H.K., Prokuroria njofton se gjatë bastisjes në banesën e tij në Prizren janë sekuestruar 4.436 kilogramë kokainë të destinuara për shitje, si dhe pajisje për paketim, përfshirë peshore digjitale, qese, role foli, kartela dhe para që dyshohet se rrjedhin nga aktiviteti kriminal.