“Mbarëvajtja e procesit të deritanishëm të dialogut ndërmjet Kosovës dhe Serbisë në Bruksel, si dhe hapat e ardhshëm në këtë proces”, ishin temat kryesore të diskutuara gjatë takimit midis kryeministrit të Kosovës, Albin Kurti, dhe Përfaqësuesit Special të Bashkimit Evropian për Dialogun Kosovë-Serbi dhe çështje të tjera rajonale të Ballkanit Perëndimor, Miroslav Lajçak.
Gjatë punimeve të Symi Symposium që po mbahet në Greqi, Kurti ka ritheksuar që Qeveria e Kosovës është përherë e gatshme për dialog parimor, të balancuar e konstruktiv.
Kështu thuhet në njoftimin e zyrës së kryeministrit, ku është potencuar se nga ky dialog duhet të përfitojnë qytetarët e dy vendeve fqinje.
“Duhet të përfitojnë qytetarët e të dy vendeve nëpërmjet një marrëveshjeje të qëndrueshme e të zbatueshme, që në qendër ka njohjen reciproke”, thuhet në njoftim.
“Për këtë, kemi edhe Rezolutën e Parlamentit Evropian, të miratuar pak ditë më parë, ku bëhet thirrje që Kosova dhe Serbia të arrijnë marrëveshje bazuar në njohje reciproke”, vijon njoftimi.
Të hënën e 11 korrikut, kryeministri Kurti diskutoi në panelin me temë “Implikimet e luftës në Ukrainë: Momentum i ri për zgjerimin e BE-së dhe anëtarësimin e Ballkanit Perëndimor? Mundësitë dhe skenarët”.