Pak para mesnatës mes së premtes dhe të shtunës, një vajzë u plagos me armë zjarri në Ferizaj.
Viktima, sipas raportit të Policisë, kishte hyrë në një barnatore në qendër të qytetit. Aty brenda në drejtim të saj kishte hyrë një burrë rreth të tridhjetave, që sipas Policisë, ishte i dashuri i saj.
Pastaj, sipas dëshmitarëve, 25-vjeçaren me inicialet L.U, e kishte qëlluar të paktën dy herë me armë zjarri të tipit pistoletë.
Me të njëjtën armë, i dyshuari më pas e kishte qëlluar veten.
Andaj, të dy u dërguan në Emergjencën e QKUK-së.
Aty, viktima vajzë, mori trajtimin fillestar për trajtim të dy plagëve të shkaktuara nga arma e zjarrit. Pastaj, u dërgua në Klinikën e Ortopedisë.
“Rreth orës 23:30 ka ardhë, ku është trajtuar dhe janë bërë analizat e nevojshme. Del se ka pësuar dy plagë tej shpuese në femur dhe në dorën e djathtë. Nga qendra emergjente, ka ardhur në Ortopedi, ku gjendja e saj është shumë e mirë”, ka deklaruar Gani Jashanica, Mjek kujdestar.
Sipas mjekut kujdestar në Ortopedi, vajzës do t’i duhet një intervenim.
“Gjatë javë do t’i bëhen analizat…”, ka thënë Gani Jashanica, Mjek kujdestar.
Ndërsa, burri që dyshohet se shtiu me armë, gjendjen e pati më të rënduar, për shkak të plagës që dyshohet se ia shkaktoi vetes.
Përkundër përpjekjes së mjekëve të cilët e intubuan dhe e operuan, i njëjti vdiq në QKUK, në mëngjesin e hershëm të së shtunës.
Derisa vajza vazhdon të trajtohet, e burrit pritet t’i bëhet autopsia, Policia në Ferizaj është duke i vazhduar hetimet lidhur me rastin.