Lideri i opozitës hungareze, Péter Magyar, partia e të cilit fitoi zgjedhjet e së dielës me shumicë dërrmuese, deklaroi se qeveria e tij nuk do të mbështesë anëtarësimin e përshpejtuar të Ukrainës në Bashkimin Evropian (BE).
Ai u tha gazetarëve se çështja e pranimit të Ukrainës duhet të vendoset përmes një referendumi.
Duke folur për prioritetet e qeverisë së re, Magyar theksoi se do të përdorë mandatin e fortë për të ndërmarrë ndryshime kushtetuese, përfshirë kufizimin e mandatit të kryeministrit në dy mandate. Një nga hapat e parë, sipas tij, do të jetë krijimi i një institucioni të ri që do të mbikëqyrë sektorin publik dhe do të ketë si mision kryesor luftën kundër korrupsionit.
Në të njëjtën kohë, ai përsëriti thirrjen që Tamás Sulyok të japë dorëheqje nga posti i presidentit.
Magyar gjithashtu theksoi se synon të bashkëpunojë me guvernatorin e Bankës Qendrore të Hungarisë, Mihály Varga, duke respektuar pavarësinë e institucionit. Ai shtoi se guvernatori po ushtron detyrën në përputhje me ligjin dhe se nuk ka arsye për të krijuar “kaos” në funksionimin e institucioneve.