Në media është raportuar se kryetari i LDK-së Lumir Abdixhiku në takim me kryeministrin Albin Kurtin për çështjen e presidentit i ka kërkuar këtij të fundit një ministri.
Por, këtë e ka mohuar anëtari i Kryesisë së LDK-së, Visar Azemi.
“Pra, e para janë spekulime sepse e vërteta është që LDK-ja asnjëherë nuk ka kërkuar kurrfarë pozicionesh prej partisë në pushtet. Por e vërteta është që LDK-ja insiston që Kosova mos me pasë vakum institucional, me pasë presidentin e zgjedhur. Ka qenë proaktive në idetë të cilat i ka dhënë që nga fillimi. Kemi thënë që jemi për një emër konsensual që i bashkon të gjitha partitë politike, ose nëse kjo nuk është e mundur, atëherë duhet një marrëveshje klasike. Pra, asnjëherë nuk e kemi vendosë veten në qendër të këtyre diskutimeve, sepse partia në pushtet ka mundësi me i zgjedhë partitë e tjera.
Por çka është e vërtetë është që neve na duhet me u zgjedhë presidenti në afat sa më të shkurtër, por nëse kjo nuk është e mundshme, atëherë është faji i tjetërkujt”, u shpreh ai.
Sa i përket mungesës së disa emrave në listën e re të kryesisë së LDK-së, ai thotë se kjo listë mund të plotësohet.
“E dyta, po, LDK-ja sot e ka shpalosur një listë të kryesisë. E keni parë edhe në njoftimin që e keni marrë sigurisht, thotë që kjo listë është preliminare. Nuk është lista e parë, pra mund të plotësohet edhe me emra të tjerë nga degët e mëdha që kanë mbetur jashtë për shkak të mos ndoshta pasjes mundësi që ata pjesëtarë të deklarohen për pozicionet e tyre nëse do t’i mbajnë apo jo. Pra, mos e merrni si diçka përfundimtare, ka me vazhdu lista e kryesisë së LDK-së me u përmbushë edhe me emra të tjerë dhe së shpejti ndoshta kemi me pasë një listë përfundimtare”, u shpreh Azemi./EO