Kryeministri Albin Kurti ka deklaruar se Serbia po vazhdon të shkelë detyrimet e saj ndërkombëtare duke mos zbardhur fatin e personave të zhdukur me dhunë gjatë luftës në Kosovë dhe duke ua mohuar familjeve të drejtën për të vërtetën dhe drejtësinë.
Këto deklarata Kurti i bëri pas homazheve në Hallaq të Vogël dhe Rufc të Ri të Lipjanit, në përkujtim të 19 prillit 1999, kur forcat e armatosura serbe vranë 20 civilë shqiptarë, të cilët më pas u varrosën në një varrezë masive.
“Krahas mohimit të krimeve gjenocidale, Serbia vazhdon të shkelë detyrimet e saj ndërkombëtare duke ua mohuar familjeve të drejtën për të vërtetën dhe drejtësinë, duke mos zbardhur fatin dhe vendndodhjen e personave të zhdukur me dhunë gjatë luftës në Kosovë”, ka shkruar Kurti në Facebook.
Ai përmendi gjithashtu edhe rastin e 23 intelektualëve nga Mitrovica, përfshirë mjekë, profesorë dhe veprimtarë të të drejtave të njeriut, të cilët sipas tij u rrëmbyen dhe u zhdukën nga forcat serbe në Dreth të Zubin Potokut gjatë luftës.
Kurti tha se Serbia vazhdon të mohojë krimet e kryera gjatë luftës, ndërsa theksoi se sakrifica e të rënëve për liri mbetet udhërrëfyese për shtetin e Kosovës.