Inspektorati Qendror i Punës ka publikuar të dhënat më të fundit nga aksioni i gjerë i inspektimeve në sektorët me rrezik të lartë, i ndërmarrë pas rritjes së rasteve të vdekjeve në vendin e punës.
Sipas raportit 48-orësh, në ditën e gjashtë të këtij aksioni, inspektimet janë fokusuar kryesisht në sektorin e ndërtimtarisë, ku janë realizuar gjithsej 41 kontrolle, njofton Dukagjini.
Në 16 raste është vendosur ndalim i punimeve, përkatësisht në dy raste në Pejë, 11 në Prizren dhe tri në Prishtinë.
Inspektorati ka shqiptuar gjithashtu 13 vërejtje, ndërsa në 13 raste nuk është konstatuar nevoja për masa ndëshkuese.
Në tetë raste janë lejuar vazhdimi i punimeve, ndërsa në 12 raste të tjera parregullsitë e evidentuara janë eliminuar.
Sipas Inspektoratit, pas përfundimit të aksionit, të gjitha subjektet ndaj të cilave është vendosur ndalim i punimeve do të procedohen automatikisht në gjykata për kundërvajtje, në përputhje me shkeljet e konstatuara.