Drejtori i Institutit “Octopus”, Arben Fetoshi përmes një postimi në Facebook ka reaguar pas publikimit të kërcënimit nga organizata terroriste serbe “Brigada e Veriut” për eliminim fizik të kryeministrit në detyrë të Kosovës, Albin Kurti.
Sipas Fetoshit, rishfaqja e kësaj organizate, e cila kishte qenë e zhdukur prej kohësh, nuk përfaqëson vetëm një incident sigurie, por një mesazh strategjik me synim destabilizimin e situatës në Kosovë para zgjedhjeve të parakohshme, njofton Dukagjini.
Gjithashtu, sipas Fetoshit, ky kërcënim nuk duhet parë vetëm si urrejtje ndaj një lideri politik, por si pjesë e propagandës serbe dhe përpjekjeve për mobilizim nacionalist në veri të Kosovës.
Mes tjerash, Fetoshi shton se ky kërcënim ndaj Kurtit, sipas tij përbën test për qëndrueshmërinë shtetërore dhe reagimin ndërkombëtar ndaj ndërhyrjeve të mundshme nga Serbia.