Gjatë tërë ditës së martë Komisioni Qendror i Zgjedhjeve ishte në pritje të përfaqësuesve të partive politike.
Por, ndonëse ishte dita e fundit e afatit për dorëzim të listave të kandidatëve për deputetë, asnjë nga subjektet politike nuk ia mësyu derës së KQZ-së, e madje as emailit zyrtar.
Kur po kalonin orët e fundit, partitë, ishin ende duke punuar për t’i bindur emrat, që do t’i zinin vendet e fundit të mbetura.
Andaj, një procedurë të tillë, nuk e kreu as subjekti më i madh politik, Vetëvendosje.
“Deri pasditen e së martës, kryetari i Lëvizjes Vetëvendosje po zhvillonte takime me qëllim të plotësimit të listës me kandidatë për deputetë. Andaj, nga ky subjekt politik, deklaruan jozyrtarisht që listën zyrtare në KQZ- nuk pritet ta dorëzojnë deri fare pak minuta para skadimit të afatit”.
Ndërkohë, gjatë ditës LDK-ja njoftoi se pas Vjosa Osmanit e kandidatëve që ajo ka sjell, në listë do të garojnë edhe bashkë me Ballin Kombëtar e Partinë e Drejtësisë.
Lista e kandidatëve për deputetë nuk është bërë publike gjatë ditës as nga PDK-ja e AAK-ja.
Sipas njohësve të çështjeve politike, vonesa në dorëzimin të listave është e qëllimshme.
“Vonesa e dërgimit të listave bëhet me qëllim politik, në mënyrë që kandidatët potencialë, të mos kenë oferta të tjera nga partitë, si dhe që të menaxhohet më mirë presioni i brendshëm për numrat në listë”, tha për Dukagjinin, Basri Muja, njohës i çështjeve politike.
Subjektet politike, 27 sa kanë konfirmuar pjesëmarrjen në zgjedhje, kanë afat që listat e tyre t’i dorëzojnë në KQZ deri sonte në mesnatë.