Forcat ajrore saudite kanë goditur objektiva të lidhura me milicitë e mbështetura nga Irani në Irak gjatë luftës me Iranin, sipas burimeve të ndryshme, raporton Reuters.
Sipas raportimit, avionët luftarakë të Arabisë Saudite kanë kryer sulme ajrore ndaj caqeve të lidhura me milici shiite pro-Teheranit në veri të Irakut, pranë kufirit me Arabinë Saudite.
Sulmet dyshohet se janë kryer në kuadër të përgjigjeve ndaj sulmeve me dronë dhe raketa ndaj Arabisë Saudite dhe vendeve të tjera të Gjirit.
Burime të sigurisë irakiane dhe një zyrtar perëndimor thonë se disa prej këtyre goditjeve kanë ndodhur rreth kohës së një armëpushimi të përkohshëm mes SHBA-së dhe Iranit në fillim të prillit.
Sipas të njëjtave burime, objektivat përfshinin baza nga të cilat lëshoheshin dronë dhe raketa drejt vendeve të Gjirit.
Në sulme janë shkatërruar edhe objekte të përdorura nga milicia Kataib Hezbollah për komunikim dhe operacione me dronë, ndërsa raportohet edhe për viktima në radhët e luftëtarëve.
Në raport përmendet gjithashtu se disa sulme me raketa janë nisur nga territori i Kuvajtit drejt Irakut, por nuk është e qartë nëse ato janë kryer nga forcat e Kuvajtit apo nga ushtria amerikane, e cila ka prani të madhe në atë vend.
SHBA nuk ka dhënë koment, ndërsa autoritetet e Kuvajtit dhe qeveria e Irakut nuk kanë reaguar menjëherë.
Raporti thekson se Arabia Saudite dhe Emiratet e Bashkuara Arabe kanë kryer edhe sulme brenda territorit iranian gjatë konfliktit, si kundërpërgjigje ndaj sulmeve që vinin nga Irani.
Në të njëjtën kohë, milicitë e mbështetura nga Irani në Irak akuzohen se kanë lëshuar qindra dronë drejt vendeve të Gjirit, duke përfshirë Arabinë Saudite dhe Kuvajtin, gjë që ka rritur tensionet në rajon.
Sipas raportit, marrëdhëniet mes Irakut dhe vendeve të Gjirit kanë qenë historikisht të tensionuara, veçanërisht që nga pushtimi i Kuvajtit nga Iraku në vitin 1990, një ngjarje që la pasoja të gjata në rajon.