Prokuroria Themelore në Pejë ka bërë ditur se në koordinim me Policinë e Kosovës pas një pune intensive hetimore, është arrestuar dhe ndaluar për 48 orë i dyshuari me inicialet A.B., nën dyshimin e bazuar se ka kryer veprën penale “Materialet me përmbajtje të shfrytëzimit dhe keqpërdorimit seksual të fëmijëve”.
Sipas njoftimit të Prokurorisë, gjatë realizimit të operacionit janë sekuestruar edhe pajisje elektronike, për të cilat dyshohet se janë përdorur për kryerjen e veprës penale të lartcekur, njofton Dukagjini.
“Brenda afatit ligjor, Prokurori i Shtetit do t’i ndërmarrë të gjitha veprimet e nevojshme hetimore dhe procedurale, në koordinim me Policinë e Kosovës, me qëllim të ndriçimit të plotë të këtij rasti penal”, thuhet në njoftim.