Të paktën 90 persona kanë humbur jetën në një shpërthim në një minierë qymyri në Kinën veriore, sipas mediave shtetërore.
Shpërthimi i gazit në minierën e qymyrit Liushenyu në provincën Shanxi është katastrofa më e keqe minerare në Kinë që nga viti 2009.
Raportohet se kishte 247 punëtorë në detyrë kur ndodhi shpërthimi në orën 19:29 sipas kohës lokale të premten (22:29 GMT), me më shumë se 100 persona të nxjerrë në siguri dhe qindra ekipe shpëtimi të dërguara në vendngjarje, shkruan BBC.
Presidenti kinez Xi Jinping tha se nuk duhet kursyer asnjë përpjekje në përpjekjet për të trajtuar të plagosurit dhe për të kërkuar të mbijetuarit. Këshilli shtetëror i vendit tha më vonë se do të kryhet një hetim “rigoroz” dhe ata që gjenden përgjegjës do të “ndëshkohen rëndë”.
Njëzet e shtatë persona mbeten në një spital lokal, me një në gjendje kritike, ndërsa pjesa tjetër ka lëndime të lehta. Shumica u prekën pasi thithën gaz helmues, sipas mediave shtetërore, megjithëse nuk është e qartë se çfarë lloj gazi ishte.
Wang Yong, një minator i plagosur, i tha medias shtetërore se kur ndodhi incidenti, ai nuk dëgjoi asnjë zhurmë, por pa një re të papritur tymi.
“Ndjeva erë squfuri, të njëjtën erë që merr nga shpërthimet. U bërtita njerëzve të iknin. Ndërsa po vraponim, pashë njerëz që po shembenin nga tymi. Pastaj edhe unë humba ndjenjat”, tha ai.
“U shtriva aty për rreth një orë a më shumë para se të vija në vete vetë. E zgjova personin pranë meje dhe dolëm jashtë së bashku.”/KP