Kandidati i Partisë Demokratike të Kosovës për deputet, Bekim Haxhiu ka zhvilluar një takim me Gjeneralin Xhevahir Geci, miq dhe mbështetës të PDK-së, ku ka vlerësuar rolin e luftëtarëve të Ushtrisë Çlirimtare të Kosovës në çlirimin e vendit.
Haxhiu tha se Gjenerali Geci ishte ndër bashkëluftëtarët e celulës së parë të Komandantit Legjendar Adem Jashari, të cilët “ndryshuan epokën e robërisë në epokën e lirisë së Kosovës”.
Ai akuzoi pushtetin aktual për cenim të vlerave kombëtare përmes, siç tha, linçimeve publike dhe krizave të prodhuara nga Qeveria Kurti. Sipas Haxhiut, sulmet ndaj luftëtarëve të UÇK-së ngjasojnë me retorikën e përdorur dikur nga Serbia ndaj çlirimtarëve.
Në fund të postimit të tij, kandidati i PDK-së bëri thirrje për unitet dhe rikthim të dinjitetit qytetar, duke përdorur sloganet: “Stop sulmit ndaj vlerave të UÇK-së”, “Stop përçarjes”, “Stop krizës” dhe “Ndrysho Kosovën!”.