Kryeministri i Kosovës, Albin Kurti, ka shprehur respektin dhe nderimin për ish-kryeministrin e Japonisë, Shinzo Abe, i cili është vrarë ditë më parë.
Në librin e zisë, të hapur në Ambasadën e Japonisë në Kosovë, Kurti ka shkruar se puna e ish-kryeministrit Abe për demokracinë, lirinë dhe sigurinë në Japoni dhe në botë ishte e jashtëzakonshme.
Kurti e përshkroi si një burrë shteti që punoi “pa u lodhur” për të çuar përpara një vizion të përbashkët për një botë të lirë dhe të hapur.
“Kryeministri Shinzo Abe dha kontribut të rëndësishëm në marrëdhëniet ndërmjet Japonisë dhe Republikës së Kosovës. Ai ishte një mik dhe partner i madh i vendit dhe popullit tonë. Vendimi për hapjen dhe hapja e Ambasadës së Japonisë në Kosovë është bërë gjatë mandatit të Abe si kryeministër”, thuhet në njofitmin e zyrës së kryeministrit.
Sipas Kurtit, nisma e ish-kryeministrit Abe për Ballkanin (“Iniciativa për Bashkëpunim për Ballkanin Perëndimor”) e kishte përfshirë Kosovën në mesin e shtatë vendeve dhe “vazhdon të jetë aktive me mbështetjen dhe ndihmën e Qeverisë së Japonisë”.
“Gjatë kohës së kryeministrit Abe, Japonia ishte ndër pesë kontribuesit kryesorë në Kosovë në arsim, mjedis, emergjenca dhe fatkeqësi natyrore, televizion publik, trajnim të zyrtarëve shtetërorë dhe lokalë dhe investime të tjera”, vijon njoftimi.
Ish-kryeministri japonez, Shinzo Abe, ka vdekur pasi është qëlluar me armë të premten, përgjatë fushatës për zgjedhjet parlamentare.
Abe, 67-vjeçar, i cili njëherësh mbetet kryeministri më jetëgjatë i Japonisë, u qëllua prapa gjersa ishte duke mbajtur një fjalim në fushatë.
Policia ka bërë të ditur se një burrë 41-vjeçar i dyshuar për kryerjen e kësaj vepre në qytetin perëndimor të Narës është arrestuar.
Policia ka identifikuar autorin e dyshuar si Tetsuya Yamagami, banor në Nara. Mediat thanë se ai kishte shërbyer në ushtrinë japoneze.
Momenti kur qëllohet për vdekje ish-kryeministri japonez Shinzo Abe (VIDEO)