Të paktën 11 persona kanë humbur jetën pasi një aeroplan civil që transportonte parashutistë u rrëzua në qytetin Tomblaine, në lindje të Francës, kanë bërë të ditur autoritetet lokale.
Mes viktimave janë piloti dhe 10 pasagjerë, përfshirë pesë studentë dhe pesë instruktorë, sipas zyrtarëve lokalë.
Aeroplani, i cili përdorej nga një shkollë parashutizmi, kishte ngritur nga aeroporti Nancy-Essey kur ndodhi aksidenti, raportojnë mediat franceze.
Policia ka bërë thirrje që qytetarët të shmangin zonën përreth aeroportit në departamentin Meurthe-et-Moselle.
Ministri francez i Transportit, Philippe Tabarot, dhe ministri i Brendshëm Laurent Nunez janë nisur drejt vendit të ngjarjes, të cilin e kanë cilësuar si një “tragjedi të tmerrshme”.
Prefekti i Meurthe-et-Moselle, Yves Seguy, ka deklaruar për AFP se asnjë qytetar jashtë avionit nuk është lënduar, duke theksuar se fatmirësisht nuk ka pasur viktima të tjera në tokë, raporton BBC.
Sipas tij, aeroplani është rrëzuar pothuajse vertikalisht pranë një zone banimi dhe në afërsi të një qendre tregtare.
“Avioni ra pothuajse vertikalisht, shumë pranë një lagjeje banimi, në skajin e aeroportit,” tha Seguy për BFM TV, duke shtuar se është fat që nuk ka pasur viktima të tjera.
Autoritetet lokale gjithashtu kanë bërë të ditur se disa nga familjarët e viktimave ndodheshin në aeroport në momentin e aksidentit.
Gjysma e parashutistëve të vdekur ishin infermierë, ka deklaruar për BFM presidenti i degës së Meurthe-et-Moselle të Urdhrit të Infermierëve të Pavarur, Thierry Pechey.
Hetimet për shkaqet e aksidentit janë duke vazhduar.