Policia e Kosovës ka raportuar kater raste të ndara që lidhen me armëmbajtje pa leje dhe posedim të paautorizuar të armëve gjatë 7 korrikut, ku janë sekuestruar armë zjarri, municion dhe janë arrestuar disa persona.
Në fshatin Bube të Zubin Potokut, policia ka gjetur dhe sekuestruar 374 fishekë të kalibrave të ndryshëm në një stallë bagëtish.
“Është raportuar se në një stallë të bagëtive janë gjetur dhe sekuestruar 374 fishekë të kalibrave të ndryshëm. Me vendim të prokurorit rasti është në procedurë hetimore”, thuhet në raportin e Policisë.
Ndërkaq, në fshatin Skoqan të Vushtrrisë, është arrestuar një person pasi gjatë kontrollit iu gjet një armë gjuetie me tre fishekë.
“Gjatë kontrollit tek i dyshuari është gjetur dhe sekuestruar një armë gjuetie me tre fishekë. Pas intervistimit, me vendim të prokurorit, ai është liruar në procedurë të rregullt”, njofton Policia.
Po ashtu, në rrugën “Ramiz Cërnica” në Prishtinë, policia arrestoi një person, pasi në veturën e tij u gjet një pistoletë me një karikator dhe 13 fishekë.
“Pas intervistimit, me vendim të prokurorit, i dyshuari është liruar në procedurë të rregullt”, bëhet e ditur në raport.
Ndërsa në fshatin Hallaq i Vogel në Lipjan, një qytetar raportoi se kishte gjetur dy kuti me municion pranë oborrit të shtëpisë së tij.
“Në vendin e ngjarjes janë gjetur dhe sekuestruar 64 fishekë me gaz. Rasti është në procedurë hetimore”, thuhet në njoftimin e Policisë.