Ministria e Shëndetësisë e Iranit njoftoi se të paktën 14 persona kanë humbur jetën si pasojë e sulmeve ajrore të kryera nga Shtetet e Bashkuara gjatë dy netëve të fundit.
Sipas Hossein Kermanpour, drejtues i marrëdhënieve me publikun në ministri, sulmet amerikane të zhvilluara më 8 dhe 9 korrik goditën objektiva në pesë provinca të Iranit, duke lënë gjithashtu 78 persona të plagosur, shkruan BBC, transmeton Dukagjini.
Ai bëri të ditur se 47 prej të plagosurve vazhdojnë të marrin trajtim në spital, ndërsa ekipet mjekësore mbeten në gatishmëri për t’u përballur me pasojat e sulmeve.
Ndërkohë, guvernatori i qarkut Iranshahr, në jug të Iranit, deklaroi për mediat shtetërore se një person u vra gjatë një sulmi amerikan që goditi një ndërtesë në aeroportin e qytetit. Autoritetet lokale po vlerësojnë dëmet materiale dhe nuk kanë përjashtuar mundësinë që numri i viktimave të rritet.
Këto zhvillime vijnë në një kohë kur tensionet mes Uashingtonit dhe Teheranit janë përshkallëzuar ndjeshëm, pas një serie sulmesh të ndërsjella që kanë rritur shqetësimet për zgjerimin e konfliktit në Lindjen e Mesme.