Eksperti i sigurisë Avni Islami, lidhur me aksionin e institucioneve të Kosovës për rrënimin e ndërtimeve pa leje, ka thënë se operacioni bazohet në sundimin e ligjit dhe trajtimin e barabartë të të gjithë qytetarëve, pa dallim etnie.
Përmes një postimi në Facebook, Islami ka bërë të ditur se aksioni shtetëror tashmë është zhvilluar në disa zona të vendit, përfshirë Rugovën, Brezovicën dhe rajone të tjera, ndërsa tani po shtrihet edhe në veriun e Mitrovicës.
Sipas tij, ndërhyrjet e fundit janë përqendruar në zonën përreth Liqenit të Ujmanit, ku janë identifikuar një numër i konsiderueshëm i ndërtimeve pa leje, disa prej të cilave u përkasin eksponentëve të lartë politikë serbë.
Islami ka kritikuar mediat zyrtare në Beograd, të cilat po përpiqen ta paraqesin operacionin si një veprim me motive politike.
Ai vlerësoi se zbatimi i aksionit mbi bazën e ligjit e rrëzon këtë narrativë dhe i lë pa mbështetje pretendimet për prapavijë politike apo diskriminim etnik.