Avokati Arianit Koci ka bërë të ditur se një i ri nga Kosova është ndaluar të shtunën nga policia serbe në pikën kufitare Horgosh, në kufirin mes Hungarisë dhe Serbisë, teksa ishte duke udhëtuar nga Gjermania për në Kosovë.
Sipas Kocit, bëhet fjalë për një të ri të lindur në vitin 1997, i cili vazhdon të mbahet në ambientet e policisë në pikën kufitare teksa shton se informacionin e ka marrë nga një person, identitetin e të cilit e ka konfirmuar, por ka shtuar se deri më tani nuk ka të dhëna të konfirmuara për statusin procedural të të riut.
Sipas burimit të Kocit, gjatë kontrollit të automjetit policia serbe ka gjetur një emblemë të UÇK-së nën ulësen e veturës, për të cilën i riu dyshohet se nuk kishte dijeni se ndodhej aty teksa në automjet janë gjetur edhe disa monedha të argjendta.
Avokati ka theksuar se, sipas informacioneve që posedon, deri në këtë fazë sjellja e policisë serbe ndaj të riut ka qenë korrekte.
Kujtojmë se deri tani nuk ka asnjë komunikim zyrtar nga autoritetet e Kosovës lidhur me këtë rast.