Ushtruesja e detyrës së presidentes, Albulena Haxhiu, gjatë një vizite në fshatin Kalludër, ku po zhvillohen gërmime për gjetjen e personave të zhdukur me dhunë gjatë luftës së fundit në Kosovë, deklaroi se nuk mund të ketë paqe të qëndrueshme mes Kosovës dhe Serbisë për sa kohë Serbia vazhdon të fshehë të vërtetën për krimet e luftës.
Haxhiu tha se mbetjet e gjetura në lokacion janë konfirmuar se janë njerëzore, ndërsa u bëri thirrje institucioneve dhe publikut që të ruajnë integritetin e hetimeve për shkak të ndjeshmërisë së procesit dhe respektit ndaj familjeve të personave të zhdukur.
Ajo falënderoi Policinë e Kosovës, Prokurorinë, Institutin e Mjekësisë Ligjore dhe institucionet e tjera të përfshira në kërkimin e së vërtetës.
“Personat e zhdukur me dhunë gjatë luftës së fundit në Kosovë janë plaga më e madhe me të cilën përballemi edhe sot. Edhe pse kanë kaluar mbi 27 vjet nga lufta, ne ende po përballemi me pasojat e saj dhe po bëjmë përpjekje maksimale për të kuptuar se ku ndodhen personat e zhdukur me dhunë”, deklaroi Haxhiu.
Ajo akuzoi udhëheqësit e Serbisë për vazhdimin e gjuhës së urrejtjes, retorikës shoviniste, mohimit të krimeve të luftës dhe pretendimeve territoriale ndaj Kosovës.
“Nuk mund të ketë paqe ndërmjet Kosovës dhe Serbisë për sa kohë kemi varre të fshehura, arkiva të mbyllura dhe mohim të së vërtetës nga ana e Serbisë”, u shpreh ajo.
Në fund, Haxhiu u bëri thirrje partnerëve ndërkombëtarë që të shtojnë presionin ndaj Serbisë për hapjen e arkivave shtetërore, duke theksuar se mbi 1.500 persona vazhdojnë të figurojnë të zhdukur dhe familjet e tyre ende presin të mësojnë fatin e më të dashurve të tyre.