Një person është plagosur me armë zjarri të premten mbrëma në rrugën “Fatmir Dibra” në Skenderaj.
Sipas raportit 24-orësh të Policisë së Kosovës, rasti ka ndodhur më 31 korrik 2026, rreth orës 23:25.
“Viktima mashkull kosovar, është dërguar në Spitalin e Mitrovicës për tretman mjekësor, pasi që dyshohet se është plagosur me armë zjarri nga i dyshuari mashkull kosovar”, thuhet në raportin policor.
Policia ka bërë të ditur se në vendin e ngjarjes janë sekuestruar tri gëzhoja, të cilat dyshohet se lidhen me rastin.
Pas marrjes së tretmanit mjekësor, viktima është liruar nga spitali, ndërsa i dyshuari nuk është arrestuar ende dhe gjendet në arrati.
Rasti është iniciuar si vrasje në tentativë dhe është duke u hetuar nga njësitet kompetente.