Komuna e Prishtinës ka njoftuar se është informuar për dëmtimin e një shtylle të ndriçimit në rrugën magjistrale M-2, në afërsi të një rrethrrotullimi, duke u bërë thirrje qytetarëve që të kenë kujdes të shtuar gjatë kalimit në këtë segment rrugor.
Sipas njoftimit, shtylla e dëmtuar nuk është aset në pronësi apo administrim të Komunës së Prishtinës, por është pjesë e infrastrukturës rrugore që administrohet nga Ministria e Infrastrukturës.
“Për shkak të rrezikut të mundshëm për qytetarët dhe pjesëmarrësit në komunikacion, u bëjmë thirrje të gjithë qytetarëve që të tregojnë kujdes të shtuar gjatë kalimit në këtë segment rrugor”, thuhet në njoftimin e Komunës.
Komuna i ka bërë njëkohësisht thirrje Ministrisë së Infrastrukturës që të ndërhyjë sa më shpejt për sanimin e shtyllës së dëmtuar.
“I bëjmë thirrje Ministrisë së Infrastrukturës që të ndërhyjë me urgjencë për sanimin e kësaj shtylle dhe eliminimin e çdo rreziku potencial, në mënyrë që të garantohet siguria e qytetarëve dhe e komunikacionit”, thuhet më tej në njoftim.