Partia Demokratike e Kosovës (PDK) i ka bërë thirrje kryesuesit të seancës konstituive, Avni Dehari, që ta vazhdojë seancën dhe të mundësojë konstituimin e Kuvendit.
Në një reagim ne “Facebook”, PDK ka kërkuar “rikthimin e rendit kushtetues” dhe ka akuzuar Deharin se roli i tij si kryesues i seancës konstituive është i përcaktuar dhe i kufizuar nga Kushtetuta, aktgjykimet e Gjykatës Kushtetuese dhe Rregullorja e Kuvendit.
“PDK është në Kuvend dhe kërkon me vendosmëri rikthimin e rendit kushtetues në vend. Reflektoni – HAPENI KUVENDIN!”, thuhet në reagimin e PDK-së.
Partia ka theksuar se përgjegjësia e kryesuesit është që të mundësojë zhvillimin dhe vazhdimin e seancës deri në konstituimin e Kuvendit.
“Z. Dehari, ju rikujtojmë se roli juaj si kryesues i seancës konstituive, sipas moshës, është i përcaktuar dhe i kufizuar nga Kushtetuta, aktgjykimet e Gjykatës Kushtetuese dhe Rregullorja e Kuvendit”, thuhet në reagim.
PDK ka kundërshtuar mundësinë që kryesuesi të marrë vendime bazuar në vlerësime politike apo jashtë kompetencave të përcaktuara me Kushtetutë dhe rregullore.
Në fund, PDK ka përsëritur kërkesën për vazhdimin e seancës konstituive dhe funksionalizimin e Kuvendit.